Del fosc galactic al lum de l’universal gèni francés.
-°-
(un còp èra bravament abans 1229, bravament sense cap de dobte)
-°-
Per nòrma aquò auriá degut èstre escrit en francés, per respectar lo gèni francés o per supèrba-dignitat de la Grandeur de la France, mas... es la vida simpla del pòble d’enganaires que vos serà contat aquí, sovent manipulats per saberuts que sabem pas encara a quin nivèl de la sapiença galactica son, benlèu setats a la dreita de Dieu ? Es aital. Ben a l’imatge de la Grandeur linguistique française, lo poder lingüistic dictatorial es lo que mana e decidís la lenga de la seuna administracion per l’unenc pòble a dimension variadissa. Vos contarai de la sapienta Histoire de France, mas en occitan, una lenga indigenista, lenga de l’esclavitud [interdicha tre 1229 per una primièra autoritat forana], mas aquesta lenga es tanben una mena de miralh lingüistic de la romanitud, o the old francitud, que los lingüistas franceses la díson patois, per pas la nommar e subretot l’admirar, ça díson los saberuts d’amontnaut [son sempre amontnaut los saberuts pels occitans francofils].
-°-
L'univèrs donc s’es creat fa unes 13.700 milions d'annadas, amb l'explosion de Dieu (çò que sabem populariament coma lo Big Bang) e donc i èran jà a costat. Aproximadament 10 minutas aprèp, ja s'èra format l'Esperit Nacional Francés, perdon French National Spirit [se cal far entendre de totes!], e, lo que es mai important, se pausávan las basas solidas pel desvolopament de la Constitucion de 1789, dins lo respècte del divin dreit capecian, puèi lo desvolopament de la Liberté, Égalité, Fraternité : la Nacion Francesa sap inventat concèptes politics universals e los ensenhar dins las escòlas e universitats dichas de sciences politiques, quitament se l’universal èra de còps sonque al entorn de la mar nòstra, la nòstra, pas la lora ; nosauts la disem la Mar Nostrum, es de díser.
En aqueles tempses bolegadisses l'univèrs èra dense e caòtic, coma una mica d'atomes. E pauc a pauc, çaquelà, gràcias a la raça laïca e a la fúria armada o escolara, mantunes dels atomes se son anats per se ligar, se formèt aital una proto-França. Sabiam pas encara –soi un ignorant francés- quines son los istoriadors franceses del Collègi o de l’Acadèmia que afírman que França es la nacion mai antiga d'Euròpa. Los meus estudis indícan que non solament d’Euròpa, sinon de l'Univèrs. Mai antiga que la formacion de las galaxias e, per descompdat, fòrça mai antiga que la Tèrra [me sembla que l'ai legit dins Sciences&Vie del mes d'octobre].
Mentre los autres atomes que avián de formar nebuloses, galaxias e autres cosses continuávan se formant un pauc sense disciplina, los atomes franceses s’exprimávan gràcia a l’escòla republicana hussardienne, la departementalizacion dels esperits, siá ambe fòrça e òrdre militar [lo modèl n’èra lo Julius Ferricum, que n'aurà mantunes descendents rigoroses] e s'organizávan ambe autentic patriotisme de lenga francesa, dins palais que díson democratics, a Paris o dins ostal sonat préfecture. Benlèu pels scientifics mai embarrats pòt sonar exagerat mas los atomes franceses tenián cagèra per formar França. [es benlèu peraquò que avem ara problèmas de desvolopament institucionals ambe los vesins, car avem frontièras naturalas, mas pas pels esperits brilhents que son anats evidentalement cotrias e per esséncia]
Segon l'historiador Stanley Georges Payne, los atomes franceses èran compausats d'electrons, protons, neutrons e autres quarks, coma los patriotons, academicons, petainiscons, collegicons, plutocratons, constitucionalistons o bonapartins, en mai de las seunas correspondentas antiparticulas: maçons, uniformistons, separatistrons, comunaristrons, comunistrons e poltrons, laïcons e extrèmas-cons (doás categorias aquí que arribem gaire de destriar).
Gràcias a la casta de la fòrça nucleària màger, las antiparticulas se son convertidas en particulas nacionalas o son estadas destrusidas per fotons plens de cambas e galhardiá, amai, per mantunes, los avem exportats a Brussels.
La rèsta de l'univèrs continuava a la deriva mas aiçò non entrevava que los atomes franceses continuèssen la seuna particulara crozada [contra los albigeses, los protestants, lo jansenistas, los "puristes" de las autras lengas, etc.]. Se son organizats en moleculas de casta e de partits e, en paucs milièrs d'annadas s'èra format practicament Caponariá o Capolariá, çò que los scientifics anomenan Lo Jaç de França. Los atomes franceses, plens d'orgulh an aquesit propietats fins alaras inauditas, coma la dualitat onda-particula e, fasent cas omís de las pressions universalas respècte al principi d'incertesa de la mecanica quantica, continuávan la magna òbra de la Construction Nacionale. L'aparicion de Caponariá o Capolariá a l'univèrs a creat un camp gravitatòri fòrça estable coma se al seu entorn se poguèssen formar la Catedral de París e La Borsa Euronext, mai tanben l’exemple institucional e sampitèrne d’una monetarizacion virtuala de la magolha.
Ambe una parelha de milions d’annadas la Nacion Francesa èra una realitat, la resèrva espiritual de la galaxia (que encara se trobava en estat embrionari), ambe tantes presonièrs que lo nombre n’èra desconegut, quitament lo tribunal d’Estrasborg e la premsa francofila aviá mestièr d’avocats per ne saber un nombre aproximatiu. Vesent que tot aiçò èra bon, la rèsta d'atomes se son concentrats al entorn de França e aital se son formats la Tèrra e lo Solelh.
Tre que lo Solelh es aparegut, los problèmas per la Nacion Francesa se son desvolopats armoniosament, cadun se voliá Solelh sus aquesta planeta, dins la Nacion Francesa, la famosa que a inventat lo dreit salic e la lenga universala, la guillotine pour les autres, la justícia de casta e la vida dins castèls de luxe, lo lum filosofic, lo lum nuclear e lo republica plutocratica, lo colonialisme republican, l’estela logistica parisenca, l’egalitat fratèrna, l’inegalitat lingüistica e los problèmas sexuals dels umans d’Africa o los viets nègres [segon un recent istoriador de la television francesa, Pascal Sevran], la solidaritat democratica ambe los rics, la couverture à soi, e lo famós bonapartisme institucional ambe lo corrolari la sang ciutadana que se dèu donar per la patria, per aver un nom escrit suls monuments installats per aquesta comunicacion ontologica e sapienta, puèi cantar pendent l’imne nacional, e que l’escòla de la sapiença republicana l’aprendrà per obligacion [e malgrat tot, donc, pas ges l’invencion de la podra!].
L'aparicion dels amino-acides e de las primièras fòrmas de vida, coma bactèrias, protozoos e Jean-Pierre Chevènement èran sonque question de tempses. Aprèp aquesta arribada novèla, se trapèran tanben cosses, que la recèrca meuna perseguís d’estudiar, que sabem pas la quita origina etnica, segur que es ontologica, mas avem idèa del contengut mas zo podem pas dire sancierament aquí, son proto-democratas sonats Sarkozy, Frêche, de Villiers, Arlette e sobretot Le Pen, ambe sa marina o sense. E malgrat una recèrca universitària e francofòna [las melhoras ben segur], sem tanben en manca de descripcion pels trucs que se díson d’esquerra, trucs de çò que se dís de la Nacion Francesa.
-°-
Per clavar e en rason de l’orgina gloriosa de França, parlarem del regional [una linha que sofrirà], que es obligatòria dempuèi abans ièr per zo far bravament aprèp l’aprèp-doman, a TOOLOOS’ tot aquò se mescla ben e s’acontenta d’un territòri estequit de poder.
-°-
Serà lo meu subre-polit politis-conte de Nadau.
E cric e crac lo conte es acabat.
