arcuèlh

diumenge, de juny 04, 2017

lo còr sarrat vos escrivi aquel bilhet

Ai escotat dissabte « lo Talhèr del poder », en lenga imperialista « l'Atelier du pouvoir » francés plan segur, car sonque en fRança es donat d'aver de poder politic, se sona centralisme ; ai sempre aigut una aurelha fina per aquel programa qu'ai sovent trobat legitimista ; e ben, per un còp l'es pas estat ... quitament se una inquietud (del productor) s'entendrà dins lo programa al mens tres còps : « vos vòli rassegurar fau anar votar dimenge venent per las legislativas » ... son programas legitimistas çaquelà ! Es un programa de la radiofonia oficiala francesa ; es donc per una ràdio jacobina per esséncia politica, ontologicament, fau sul pic donar las felicitacions al programa, mentre que la critica del programa arribarà en fin de bilhet.


Donc fau felicitar Radio fRance, e la direccion de fRance CULture d'aver programas, pichonetament critics del sistèma centralista francés, enfin !

Vos fau escotar aquel programa en urgéncia abans d'anar votar per un partit del mendre mal jacobin, lo sol que saurà aficar un federalisme a dòsi minimalista (fau pas pantaissar, son pas nombroses, lo sol que sabi en Occitània e qu'a lo mejan de se pagar una campanha es EELV). Quitament En marche ! que se vòl « dins lo vam de la revolucion del patron, Emmanuel Macron » son per la centralizacion de la taxa d'abitacion ... lo contrari de çò que fau far.

Al mièg del debat çaquelà un interlocutor explica que los deputats son tròp nombroses, mas se lo nombre se dèu demesir (i aurà aital parçans grands del monde rural qu'auràn pus de representant), la soma per donar als Parlaments dèu èstre servadas, per poder ajudar los Parlamentaris (sembla qu'o fan pas fins ara) : 1 / verificar que las leis votadas son aplicadas e benlèu que pausan problèmas, 2 / quand fan la lei l'avejaire de l'administracion francesa es benlèu lo sol mejan per aver d'informacions seguras e la realitat del terrenh ! 

Quand se coneis lo subjecte de las politicas per las lengas ditas regionalas, aquelas doás criticas son plan conegudas en Occitània :
a/ escotar lo sol son, las sonalhas dels quadres de l'Éducation dita Nationale per aver de las estadisticas per l'ensenhament de l'occitan es pas una assegurança de l'eficacetat d'aquel ensenhament. E son pas las superbas competéncias militantas dels professors de letras que faràn capitar aquel ensenhament de manièra generalizada, tal que se sembla fau far per salvar una lenga en dangièr. 
b/ escotar los sols sons, los bruches repuylsius, dels directors de France Télévision 3 sul tèma de las emissions en lengas ditas regionalas, es coma escotar lo carnissièr nos parlar del sofriment animal !

Lo programa de fRance CULture çaquelà assajarà a cada moment de trobar solucions, reformetas, per curar la dificultat, la dificultat es clara : es que lo parlamentarisme exista pas en fRança. Mas jamai, dins un questionament sus l'utilitat del Parlament, o dins la supression del Sénat (e l'estauvi gigantesc que seriá) o de l'Assemblée dita Nationale ( una pèrda de temps organizat per la partidocracia republicana francesa per far creire a la democracia en fRança) ; fau pas èstre extremista çaquelà, nos diràn ; sèm a Radio fRance, e quand lo patron paga, lo fau pas criticar de manièra segura e en prigondon. Lo fau far a travèrs libres, o los convidats, jamai dins un bilhet politic, sus fRance Inter, fRance CULture, fRance Bleu (multiplas estacions de propagandas en regions) o fRance Info.

Donc vos fau legir aqueles libres, vist en illustracion, per comprendre que lo sistèma francés es reformable, mas lo fau destrusir !

Dins la critica del FN-BM es que l'Assemblée dita Nationale a perdut son ròtle inventiu, creatiu, e lo Parlament francés « se vei imposar » pel Parlament Europèu, o « l'Euròpa fabrica las leis » ... lo tèma es pas estat abordat.

De mai, dins la resolucion del problèma dels parlamentarismes parisencs, jamai se parla de delegar a als region las causas que son una illustracion de las incompeténcias legislativas centralista francesa, jamais aquò coma solucion : donar un pès legislatiu a las eventualas assemblèas regionalas, provesidas d'una poder novèl aquel de fargar la lei per las novèlas regions agradidas e en ligam real ambe lo terrenh ; alara que dins lo programa se criçtiquèt grandament l'elonhament del terrenh en préner coma exemple un deputat de la banlèga parisenc qu'arriba per pensar cambiar la lei a 30 km, es de dire a Paris e qu'i arriba pas ; vos podètz imaginar un deputat de Polinèsia dita francesa, dels elegits dita de la forana fRança (elegits novelament integrats al bordèl parlamentari francés), de Kanaki, de Goadelopa, de Martinica, de Guina dita francesa o Péyi (America dita latina), de Corsega (que els sols son a demandar aquel poder), d'Iparralde, de Catalonha del nòrd, d'Alsàcia, d'Occitània ( e l'espaci politic aquel es granda e amerita un tractament apropriat, mas sense qu'un sol partit francés aguèsse demandar una legislacion particulara e orquestrada pels Conselhs Regionals concernits) ....