arcuèlh

dimecres, de setembre 06, 2017

Ostal d'Occitania, de que i a que truca ?

Al mes de setembre l'Ostal d'Occitania alberga un festenal del filme, es una bona causa, lo cargat capitolièr de l'occitan ne parla en occitan dins lo libret de promocion. Es un festenal que dona a veire la cultura de l'aver, faiçon grosland. Per ma fe, es una partida de la vida cultura de l'aver d'Occitània. per l'Èstre fau esperar la generalizacion de l'ensenhament de l'occitan a Tolosa, benlèu al sègle XXIIen ? Vist la rapiditat que la comuna d'esquèrra o de dreita an d'enterrar l'ensenhament dins la escòlas novèlas de la vila mondina.

Puèi dins aquel Ostal d'Occitània, Convergència Occitania a comandat una mapa mai aisida de transportar ; es una bona causa logistica, pels muscles dels emplegats ; mas fau tornar explicar que l'occitan es oficial a dos endreits en Occitània, Mónego, o díson lo monegasc (l'imne oficial ne farga la pròva, es conegut de totes ailà), e Vielha (Val d'Aran) o díson aranés, dempuèi l'estatut especial que lo Parlament de Catalunya a votat, 1986 (inscripcion refusada dins lo Parli Occitan de l'Escòla Occitana d'Estiu, per un dels co-autors del libre).  Pels neurònes dels occitanistas e visitors de l'Ostal d'Occitània ríscan pas d'èstre perturbats politicament ; es una mapa francesa en lenga occitana ; fau pas desrengar ambe las oficialitats de l'occitan, miladius !


E sembla que lo geografe qu'a comandat la mapa dèu èstre un occitanista ges geografe ni mai que sap ont l'occitan es dignament tractat, oficial ; o benlèu qu'o fau pas dire (?) ; una resulta granda de l'ensenhament a l'universitat (?) o dels capolièrs de las Escòlas Occitana d'Estiu, n'en fau dobtar ? O l'ignorança occitanista es talament granda que se comprendrà melhor perqué capita sonque dins l'umor ?

L'anciana mapa èra pesuca, la faliá tirar, e segur i aviá decas tanben ! Decas, segur mas pas d'aquela dimension : los dos endreits que l'occitan es OFICIAL desaparegut de la mapa leugièra, i dèu aver rasons politicas, o ges ? Lo Princep de Mónego a protestat ? La Val d'Aran (Vielha) refusa d'èstre plan localizat a Tolosa ? Ignorança : es mai grèu.
 Vaquí la mapa estudiada e precisa del resson lingüistic de la Comtea de Niça :  ligam


Fau indicar quina es granda la zòna lingüistica del Gavòt ? Fau indicar quines ligams lo Gavòt a ambe la rèsta de la lenga occitana (i a estudis universitaris per o assegurar, benlèu una conferéncia a l'Ostal d'Occitania serà utila ?), quitament amb lo Gascon e lo Lengadocian ? L'occitan es la diversitat dedins l'unitat plan abans l'Union Europèa.
 
L'ignorança dels diplòmas veïculada per l'universitat francesa en Occitània fa paur ! 

Es pietadós, e me fa pas rire. tè vau acabar la botelha de Delmas, aquel pinòt de Limós me fa pensar a bravament d'autras causas, mens estupidas.